Категорија: Проекти

ЗАПОЧНА РЕКОНСТРУКЦИЈАТА НА ТРОТОАРОТ НА УЛИЦАТА „СТРАШО ПИНЏУР“

ЗАПОЧНА РЕКОНСТРУКЦИЈАТА НА ТРОТОАРОТ НА УЛИЦАТА „СТРАШО ПИНЏУР“

Општината Кавадарци започна реализација на нов комунален проект. Ангажираната оператива работи на расчистување на стариот и дотраен тротоар на десната страна од улицата „Страшо Пинџур“ во правец на Ваташа.

Во наредната фаза на оој потег ќе се постават нови рабници, нов тампон и павер елементи.

Со овој проект општината ќе создаде поголема безбедност за движење на пешаците како урбанизирање на просторот.

КЕЈОТ НА РЕКАТА ЛУДА МАРА НИЗ ВАТАША ГО ДОБИВА ПРОЕКТИРАНИОТ ЛИК

КЕЈОТ НА РЕКАТА ЛУДА МАРА НИЗ ВАТАША ГО ДОБИВА ПРОЕКТИРАНИОТ ЛИК

Градежната оператива на фирмата „Градба промет“ во село Ваташа работи на кејот шеталиште по коритото на реката „Луда Мара“. Според динамиката деновиве се извршуваат работи на бетонирањето на пешачките патеки над минорното корито, се поставуваат канделабри од јавното улично осветлување, како и се доуредуваат страните од големото корито на потегот пред фудбалското игралиште.

На проектот „Кеј шеталиште“ во Ваташа досега е бетонирано минорното корито, со потребните каскади и се оформени контурите. Според проектот новиот кеј на потегот од  паркингот кај зградите „Силекс“ до последниот мост на регионалниот пат е во должина од 770 должни метри.

За реализација на овој проект општината ќе инвестира 20 милони денари.

ПРОДОЛЖУВААТ РАБОТИТЕ НА НОВИОТ МОСТ ВО ВАТАША

ПРОДОЛЖУВААТ РАБОТИТЕ НА НОВИОТ МОСТ ВО ВАТАША

Во селото Ваташа интензивно се работи на изградба на новиот мост и проширување на патот пред и после мостот на регионалниот пат кон Витачево и идниот граничен премин „Пулево“.

Постоечкиот мост во Ваташа е доста оштетен и опасен за понатамошна употреба, а и патот до мостот и после него е со незгодна кривина каде се случени повеќе сообраќајни незгоди.

Овде се санира и речното корито во должина од околу 180 метри, како и пристапниот и излезниот пат на самиот мост кој ќе биде и променет. Ќе има модерен пат и мост и поголема безбедност.

Се работи за мошне значаен проект со кој ќе се подобри безбедноста во сообраќајот на овој дел од општина Кавадарци. Проект е од огромно значење за жителите на Ваташа и се реализира на нивно барање.

Инвестицијата е во вредност од околу 480 илјади евра, а средствата се обезбедени од буџетот на ЈП за државни патишта.

ОБИКОЛНИЦАТА „СЕВЕРЕН БУЛЕВАР“ ВО ЗАВРШНА ФАЗА

ОБИКОЛНИЦАТА „СЕВЕРЕН БУЛЕВАР“ ВО ЗАВРШНА ФАЗА

Денеска започна завршната фаза на проектот на Општина Кавадарци за ревитализација на обиколницата „Северен булевар“.

Ангажираната оператива го поставува финиот завршен слој на асфалт на потегот од спојот со улицата „Шишка“ кај Општа болница се до спојот со Булеварот „Никола Минчев“ под Хотел „ФЕ-НИ“.

Предвидено е за време на викендот да се заврши асфалтирањето, како и поставувањето на хоризонталната и вертикалната сообраќајна патна сигнализација, по што од понеделник 1 јули, реконструираната обиколница ќе биде ставена во функција.

Ревитализацијата на регионалната улица „Северен булевар“ е капитален објект на Општина Кавадарци со кој се подобри и источниот влез на градот од Неготино кон Прилеп.

Проектот е дел од капиталниот зафат на општината за реконструкција на главните улици во градот. Носител на договорната обврска е градежната фирма „Бетон“ од Скопје.

Финсниските средства се обезбедени преку Одлука за долгорочно домашно задолжување на Општина Кавадарци, преку потпишување на Договор за под-заем со Министерството за финансии, во рамки на средствата обезбедени со Проектот за подобрување на општинските услуги финансиран со заем од Меѓународната банка за обнова и развој – Светска банка, а со цел финансирање на капитални инвестициони проекти,  МСИП.