Гроздобер - општо
Производството на грозје и вино во овој крај има длабоки корени. Античките Македонци и старите Римјани виновата лоза ја одгледувале
со голема љубов и умешност, за што сведочат бројните археолошки артефакти (стели, рељефи, барељефи, мозаици и т.н.), пронајдени во овој крај.
Виното било пијалок на сите сталежи и на богатите и на сиромасите, служело како платежно средство а со него можел да се плати и данокот на државата. Лозарството продолжило да се развива и во средниот век, а главни негови центри биле црковните и манастирските имоти, каде се приготвувало најубавото вино.
Со доаѓањето на Турците Османлии и нивните освојувања во овој дел од Македонија во извесна мерка стагнира лозарството, бидејќи со Куранот била забранета употребата на алкохолни пијалоци. Денес Кавадарци со право може да се пофали дека е најголем производител на грозје и вино во Македонија и еден од најголемите на Балканот.
Гроздобер - Увод
Идејата за организирање на Тиквешкиот гроздобер ја дал менаџерот на групата „Мањифико“, Борис Низамовски во февруари 1964 година кога неговата група гостувала во Кавадарци, инспириран од една слична гроздоберска манифестација во градот Дижон-Франција.
Токму тоа било и основната причина поради која општинското раководство на Кавадарци, Љупчо Шкартов и Киро Роглев, во 1964 година го организира првиот Тиквешки гроздобер, манифестација која има културен, туристички и стопански карактер.
Гроздобер - прв организационен одбор
Првиот организационен одбор за одржување на манифестацијата „Тиквешки гроздобер“ броел 60 членови, кои биле задолжени за изготвување на сценариото на самата манифестација, за естетско уредување на градот, кореографија, костимографија при што биле вклучени ликовните уметници: Јован Јосифовски-Ромбо, Ружица Јосифовска, Никола Баснарков, Петар Наневски, Агна Дренковска и др. Голема заслуга во одржувањето на тиквешките гроздобери даваат основните и средните училишта во Кавадарци.
На „Тиквешкиот гроздобер“ учествуваат многу познати и признати уметници во тогашна Југославија како: Петре Прличко, Љупка Димитровска, Зафир Хаџиманов, Сенка Велетанлиќ, Мија Алексиќ, Миодраг Петровиќ-Чкаља, Лола Новаковиќ, Предраг Гојковиќ-Цуне, Тереза Кесовија, Ѓорѓе Марјановиќ и др.
Гроздобер -
Првиот грозд на Тиквешкиот гроздобер на 7 септември 1964 година, го откинал Диме Галапчев, директор на АК „Тиквеш“. На Тиквешките гроздобери се организираа најразлични културни манифестации, гостуваа најпознатите интерпретатори на народни и забавни песни, актери, хумористи, спортисти.
Кавадарци беше препознатливо и по мото трките во организација на АМД „Страшо Пинџур“ кои се бодуваа за Државното првенство на Југославија.
На почетокот во првите 5 години од одржувањето редовен сегмент од гроздоберските свечености беше и одигрувањето на театарска претстава на античкиот театар во Стоби како уметнички спој на знтичките Дионисови денови со модерните гроздоберски празнувања.